LEES: Handelinge 8:26-40
“Filippus het…gehoor dat die man uit die profeet Jesaja lees… die Skrifgedeelte wat hy gelees het was dit: ‘Soos ’n skaap is Hy gelei om geslag te word…’” (30)
’n Hond kom een aand by ’n kamp van Sjinese Shangtunsoldate, ingedrentel met ’n bek vol bladsye van ’n Bybel wat hy iewers beetgekry het, vertel King’s Business. Die soldate beur dit uit sy bek en lees dit nuuskierig. Hulle volg die hond toe hy koers kry en kom by ’n sendinghospitaal in daardie omgewing uit. Hulle vra vir meer van daardie soort leesstof. Dit is gretig vir hulle gegee. Dr. Goforth en ’n Sjinese evangelis besoek die kamp, hou ’n paar dienste en versprei meer leesstof. ’n Goeie twee honderd van die soldate het agterna persoonlik met dr. Goforth en sy werkers oor hulle geloof en verlossing gepraat.
Die Bybel en evangeliese leesstof het groot krag om mense na die Here toe te trek. Die Heilige Gees gebruik die evangelie wat gepreek word of gelees word, om in mense se harte te werk, geloof op te wek en die Here Jesus aan hulle bekend te maak. So word Christene in hulle geestelike lewe versterk en onbekeerde mense tot redding gebring. Menslike lippe en menslike hande is nodig om hierdie heilsmiddele te versprei. Ons lippe en ons hande moet dit doen. “…na Stefanus se dood…is die gelowiges uitmekaar gejaag….na Fenisië, Siprus en Antiogië toe …die evangelie dat Jesus die Here is, verkondig… Die Here het die gelowiges gehelp, sodat daar baie mense tot geloof gekom en hulle tot die Here bekeer het” (Han.11:19-21). Dit is ’n groot voorreg met groot ewige loon as die Bybel of blaadjie of traktaatjie wat u vir iemand gegee het, die middel tot een of meer mense se bekering kan lei. Ons doen verspreidingswerk; die Heilige Gees doen bekeringswerk.
“Here, vandag wil ek u evangelie aan iemand gee.”
