Lees Efesiërs 1: 1 – 14
Deur die bloed van sy Seun is ons verlos en is ons oortredinge vergewe kragtens die ryke genade van God…” (6,7).
’n Generaal van die Engelse magte en ’n Regter van Indië reis op ’n besigtigingstoer deur Indië, vertel Power. Hulle kom in ’n behoeftige Moslemstreek. ’n Aantal vroue van ’n sendingstasie in die omgewing ontmoet en onthaal hulle. Die Indiese Regter is baie beïndruk deur die netheid en vriendelikheid van die vroue. Hy sê vir die Generaal: “Ek verstaan nie dat sulke beskaafde en ontkelde dames, in hierdie vuil en verarmde deel van die stad, werk nie.” “Ja, dit is regtig uitsonderlik,” antwoord die generaal, “tensy ’n mens natuurlik hulle motief verstaan.” “Dit is juis my probleem met hulle: hoekom doén hulle dit?” “Hulle motief is dankbaarheid.” “Dankbaarheid! Wat het ons arm mense ooit vir hulle gedoen, om enige dankbaarheid by hulle te verwek? Sê dít asseblief vir my.” “Om dit te verduidelik sal neerkom op die belangrike verskil tussen ons twee se godsdienste,” sê die Generaal. “Ek sal luister,” antwoord die Regter. “Ek sal dit met ’n verhaal moet verduidelik,” sê die Generaal. “Ek luister. Ek is gretig om dit te hoor,” verseker die Regter hom. Die Generaal vertel van die boer wie se grond onder hom uitverkoop moes word. Hy kon nie sy skuld betaal nie. Kort te vore het hy ’n baie welgestelde buurman gekry. Net voor die uitverkoping sou plaasvind, laat die bank die bankrot boer weet, sy buurman het sy skuld vir hom betaal.
Die Generaal sê: “Daardie boer kon nooit ophou om sy dankbaarheid teenoor die vreemde buurman te betoon nie.” Die Regter knik. Die Generaal vervolg: “Ons groot skuld, wat ons verlore moes laat gaan, is deur Jesus Christus vír ons betaal. Ons is vry. Ons hoéf dit nie terug te werk aan Hom nie. Maar as ons dink waaruit Hy ons verlos het en die prys wat dit Hom gekos het, het ons net die diepste dankbaarheid teenoor die Here Jesus en wil ons enigiets wat ons kan vir Hom doen.”
Hierdie dankbaarheid lê aan die wortel van elke offervaardige optrede in belang van die evangelie van die Here Jesus Christus. Hoe duideliker die besef is van wat Christus vir ons gedoen het, en waaruit Hy ons verlos het, hoe groter is die lewensoffer wat gebring word. Dit was die geheim van Paulus se totale offervaardige lewe. “…ek is saam met Christus gekruisig, en nou is dit nie meer ek wat lewe nie, maar Christus wat in my lewe. Die lewe wat ek nou nog hier lewe, leef ek in die geloof in die Seun van God wat sy liefde vir my bewys het deur sy lewe vir my af te lê” (Gal.2:19,20).
“Here, vandag wil ek my dankbaarheid, vir U groot gawe aan my, betoon.”
