Drie knoppies om te druk

Lees Johannes 16: 25 – 33

“Van daardie dag af sal julle in my Naam bid en hoef Ek nie julle voorspraak by die Vader te wees nie, want die Vader self het julle lief…” (26).

Sekere plaaslike regerings in Japan, gebruik ‘n toestel om die welstand en veiligheid van bejaar­des in hul­le ge­bied te monitor, skryf Neil Verwey vir ons uit Japan, na aanleiding van ’n be­rig in die Yumuiri News 2005-11-29. ‘n Ontvangstoestel  wat met elektromagnetiese golwe werk, word in ‘n be­­jaar­de se tuiste opgestel. ’n Wel­syn­wer­ker stuur dan elke oggend ‘n boodskap uit en die bejaarde kan dan antwoord, deur net een van drie knoppies te druk: wel, onwel, of  bel my. Die stads­raad van Wako, is een van die eerstes wat die stelsel by sy plaaslike tuisbe­stuurs­verenigings aanbeveel het. Hulle leen nou die toe­stelle aan die alleenlopende bejaar­des van die stad uit. “Ons wil hê ons seniorburgers moet weet ons is be­kommerd oor hulle,” spreek een van die amp­tena­re sy besorgdheid vir bejaardes uit. “Ons wil  hulle help wan­neer hulle dit nodig het.”

So ‘n stelsel sal vir alle bejaardes ‘n nuttige be­vei­liging wees. Gelukkig het God ook vir sy kin­ders ‘n soortgelyke stelsel beskik. Dit word in Filippense 4:6,7 beskryf: “Moet oor niks besorg wees nie, maar maak in alles julle begeertes deur gebed en smeking en met danksegging aan God bekend.” Ons geloofstelsel het ook drie knop­­pies: gebed, smeking en danksegging,. Die eerste knop­pie word deur Jakobus 5:13 beklemtoon: “As daar iemand onder julle is wat swaar kry, moet hy bid.” Ons het hulp en by­stand van God nodig. Dus die knoppie van gebed. Die tweede knoppie word aangewys deur Psalm 50:15: “Roep my aan in die dag van benoudheid: ek sal jou uithelp….” Ons is in die moeilikheid, dit is ‘n krisis en ons het die Here by ons nodig om ons te help. Dus die knop­pie van smeking. Die derde knop­­­pie, danksegging, word deur Psalm 103:2 be­klem­­toon: “Ek wil die Here loof en nie een van sy weldade ver­geet nie.” As dit met ons goed gaan, moet ons die Here met lof van ons laat hoor.

“Here, vandag wil ek U in al my omstandighede aanroep.”