Lees Lukas 16: 19 – 31
“Daar was ’n ryk man wat duur en deftige klere gedra en elke dag feestelik en weelderig geleef het….Die ryk man het …gesterwe en is begrawe…” (19,22)
’n Sirkus sou ’n plattelandse dorpie besoek. Daar het ’n seuntjie gewoon, wat nog nooit in sy lewe ’n sirkus gesien het nie. Hy was byna dood van opgewondenheid oor die vooruitsig om ’n sirkus te sien. Niks sou hom daar kon weghou nie. Vroeg die oggend al het hy sy plek langs die straat, waar die sirkusoptog sou verbygaan, ingeneem. Sy pa het vir hom ‘n R10-noot, vir toegangsgeld vir die vertoning gegee. Uiteindelik verskyn die optog. Mense juig en dromme slaan, die opgetooide diere en die helderkleurige waens beweeg stadig verby. Heelvoor, die olifante, dan die perde, dan kamele, toe die akrobate, daarna die hokke met die leeus, die tiere en ander diere. Die seuntjie was hees geskree en byna uitasem van al die opgewondenheid. Heel laaste kom die harlekyn met allerlei manewales verby. Toe hy dansend, met oop hande uitgestrek, regoor die seuntjie kom, sit die seuntjie sy R10-noot in die harlekyn se hand. Die harelkyn kyk verbaas, maar neem dit en gee ’n dankbare, besondere hoë boksprong. Die sirkusoptog verdwyn om die hoek. Die seuntjie gaan tevrede en gelukkig huis toe. Hy het die sirkus gesien, dink hy. Hy wis nie, dit was nog maar net die optog, en dat die eintlike vertoning die aand gaan plaasvind nie. In sy onkunde het hy dood tevrede sy R10, wat vir die vertoning bedoel was, vir nog net die optog betaal.
Die huidige lewe in hierdie wêreld is ook nog net ‘n optog – dan kom die ware gebeure – die vertoning – die ewigheid. Ons moet ons aardse lewe verstandig gebruik en ook geniet, soos mense met ’n sirkusoptog maak. Maar ons R10-noot, ons innerlike lewe, ons siel, moet ons bewaar vir die vertoning, vir die aanbreek van die ewigheid. Laat ons ons R10-noot nie in die hande van die wêreldharelekyn plaas nie, maar dit in die hande van die Here Jesus, die koning van die hemel, oorgee.
“Here, vandag plaas ek my lewe in U hande.”
