LEES: Psalm 51: 8 – 15
“Maar U verwag opregtheid diep in ‘n mens se hart; laat ek dan diep in my binneste weet hoe U wil dat ek moet lewe” (8)
In die Junie 1992 Reader’s Digest, se rubriek Life’s Like That, vertel Will Hedrick hoe hy geleer het eerlikheid is vir ’n mens die veiligste pad.
Eendag, gedurende sy etensuur, gaan hy gou na ’n boekwinkel toe om ’n boek te koop. Hy besluit om met sy kredietkaart te betaal. Die boekwinkel is vol mense. Die twee assistente agter die toonbank is oorhaastig en verward om almal in die drukte te bedien. Sy kredietkaart word van die een meisie na die ander aangegee. Uiteindelik is sy transaksie deur en hy stap uit met sy boek. Buite gekom, sien hy hy het albei die koopbewyse gekry, sy eie en die handelaar s’n. “I thought to myself that I’d just got a free book. However, by the time I sat down at my desk, my conscience was beginning to bother me, and I reached for the telephone.” Een van die twee assistente wat hom bedien het, antwoord die telefoon. Hy verduidelik die situasie en beloof om die handelaar se koopbewys na werk terug te besorg. Die winkelassistent antwoord: “I’m glad you called. You left your credit card on the counter.”
’n Eerlike lewenswyse is veilig vir ’n mens self en dit is veilig vir die persoon met wie ’n mens te doen het. En dit is aangenaam in God se oë as ’n mens eerlik optree. “Die opregtheid van eerlike mense bepaal hulle koers; die valsheid van onbetroubares bring hulle ondergang” (Spr.11:3).
“Here, vandag wil ek in alles eerlik optree.”
