Lees Psalm 23
”Selfs al gaan ek deur donker dieptes, sal ek nie bang wees nie, want U is by my.
In u hande is ek veilig. U laat my by ’n feesmaal aansit, terwyl my teëstanders
moet toekyk”(4,5)
“Ek was op pad huis toe na ’n harde dagtaak,” skryf C. H. Spurgeon in een van sy
boeke. “Daar was baie om my te ontmoedig en ek het moeg en terneergdruk gevoel.
Skielik, soos ’n weerligstraal, skiet die bekende teks my te binne: ‘My genade is
vir jou genoeg’ (2 Kor.12:9). Toe ek by die huis kom, soek ek dit in die
oorspronklike Grieks op en bepeins dit todat die volle betekenis my eensklaps
aangryp: ‘My genade is vir jou genoeg!’ Ek bars uit van die lag. ‘Natuurlik is
dit, Here!’ roep ek uit. Ek kon my kortsigtigheid nie glo nie. My ongeloof het
skielik so onbenullig gelyk. Dit is soos ’n klein vissie wat baie dors het, maar
hy is bang hy sal die rivier leeg drink. Nou sê die rivier vir hom: ‘Drink maar,
ou vissie, my stroom is vir jou genoeg.’ Of soos ’n klein muisie in een van Josef
se graanskure in Egipte, wat bang is hy gaan van honger omkom. Nou sê Josef vir
hom: ‘Eet maar, ou muisie, my graanskure is vir jou genoeg.’ O, laat ons God
vertrou. Wees groot gelowiges. ’n Klein bietjie geloof sal u siel moontlik in
die hemel bring, maar ’n groot geloof sal die hemel in u siel bring!”
“Here, vandag glo ek in u groot krag om ten volle in my behoefte te voorsien!”
