Lees Daniël 12: 1 – 3
“…dié wat baie mense op die regte pad gelei het, sal vir altyd skitter soos die
sterre” (3).
’n Brand het in ’n openbare gebou in Chicago uitgebreek. In die stormloop om uit
die gebou te kom, is mense doodgetrap. Ander is in kantore vasgekeer. Dit was
’n tragiese dag vir die mense van daardie welvarende stad. Een jong vrou wat
ongedeerd uit die gebou gekom het, moes later behandeling ontvang vir die skok
wat sy opgedoen het. Sy het in onbeheersde huilbuie uitgebreek. Hulle probeer
haar troos: “Jy moet dankbaar wees jy het aan daardie vreeslike vlammedood
ontkom.” Dan sê sy: “Ek is dankbaar, maar ek het nie eers één van die mense gered
nie.” Weereens vertroostende woorde: “In daadie verskriklike oomblikke van
vrees en angs het jy heeltemaal reg gehandel om jou eie veiligheid te soek.” Sy
huil weer en sê: “Ja, maar ek het nie eers probéér om iemand te red nie.”
Niemand kan die weg tot die ewige lewe vind, tensy iemand, op een of ander manier, Christus as Verlosser direk aan hom of haar bekend maak nie. Dit kan bywyse van ’n gesprek wees, ’n stukkie leesstof, prediking hoor, vir hom of haar bid.
Dit gaan eendag ’n ontstellende selfverwyt wees: “Ek het nie eers probéér om
iemand by Christus te bring nie.” Die kleinste poging kan groot vrug oplewer.
Jesus sê sy koninkrykslewe word soos ’n mosterdsaadjie in iemand se hart
ingedra, dit ontkiem, groei en word ’n boom. Nie die een wat die saadjie saai,
bepaal die groei nie, maar die saadjie self.
’n Predikant moes eens die siek vrou van ’n onverskillige kroegman besoek. Hy
het daarteen opgesien, want hy het geweet hoe ru haar man was. Tot sy verbasing
kom hy by ’n geredde vrou uit. “Hoe het dit gebeur?” vra hy verwonderd. Sy gee
hom ’n ou, verkreukelde koerant. ’n Deel van ‘n preek van Spurgeon, oor Jesus se
versoeningsdood aan die kruis, is op die koerant gedruk. “Dit het vir my die
lig gebring,” sê sy. “Maar waar kry jy dit?” “Iemand het vir my ’n pakkie uit
Londen gestuur en dit was in hierdie koerant toegedraai.”
Kom ons waag om die saad van die evangelie, soos ons daaroor beskik, al lyk dit
vir ons onbenullig, in iemand se lewe te saai.
“Here, vandag wil ek U aan iémand bekend maak.”
