Lees Handelinge 9:10-19
“In Damaskus was daar ’n…volgeling van Jesus… Ananias…die Here sê vir hom: ‘Gaan
dadelik na Reguitstraat toe…na ’n man van Tarsus met die naam Saulus… Ek het hom
gekies as my werktuig… (10,11,15).
Een van die regsgeleerde, dr. C. I. Scofield, se kliënte, Tom McPhetters, gaan
spreek hom eendag oor ’n regsaangeleentheid. Na die beraadslaging staan
McPhetters op om te loop. Met sy hand op die deurknop draai hy terug na dr. Sco
field toe. “Jy weet, Scofield, ek is die grootste lafaard op aarde.” “Hoekom,
Tom?” vra Scofield verbaas. “Wel, vir meer as ’n jaar loop ek met ‘n vraag in my
kop rond wat ek jou wil vra, en tot vandag toe het ek nog nie die moed gehad om
dit te doen nie.” “Kom sit, Tom,” nooi Scofield sy kliënt. “Vra my enige vraag wat
jy lus het. Ek luister.” Tom kyk sy prokureur in die oë: “Dit is my vraag: Hoekom
is jy nie ‘n Christen nie?” Scofield gee ’n verleë laggie. “Jy ken my groot
probleem, Tom. Die Bybel sê tog uitdruklik ’n dronkaard kom nie in die hemel
nie.” “Nee, Scofield, jy antwoord nie my vraag nie. Sê my reguit: Hóékom is jy nie
’n Christen nie?” Scofield kyk af op sy hande. “Die feit is, Tom. Ek weet nie hoe
om ’n Christen te word nie.” Tom haal ’n sakbybeltjie uit sy binnesak uit, maak
dit oop en lees vir Scofield Johannes 3:16: “God het die wêreld so lief gehad dat
Hy sy enigste Seun gegee het, sodat die wat in Hom glo, nie verlore sal gaan nie,
maar die ewige lewe sal hê.” Toe blaai hy na Johannes 5:24 toe: “Wie luister na
wat Ek sê, en in Hom glo wat My gestuur het, het die ewige lewe.” Daarna lees hy
Johannes 6:47: “Dit verseker Ek julle wie in My glo, het die ewige lewe.” En hy
lees ook nog Johannes 10:28: “My skape luister na my stem… Ek gee hulle die ewige
lewe, en hulle sal in ewigheid nooit verlore gaan nie.” Scofield kug. “Uit wat jy
vir my voorgelees het, lei ek af ek moet in Christus Jesus glo om gered te word.”
“Dis reg,” beaam Tom. “Sal jy dit nou doen?” “Jy het my aan die dink gesit en ek
gaan daaroor dink,” antwoord Scofield. “Jy het al lank genoeg daaroor gedink,
Scofield. Gaan jy die Here Jesus as jou Verlosser aanneem?” Sag antwoord
Scofield: “Ja, ek wil Hom as my Verlosser aanneem.” Oor hierdie besluit het
Scofield later aan mnr. Trumbull, skrywer van sy biografie, geskryf: “It was a
Bible conversion. Instantly the chains of sin were broken never to be forged
again; the passion for drink was gone. Devine power did it, wholly of grace.”
Dr. Scofield het later sy regspraktyk vir die bediening en die regsbank vir die
kansel verruil. Hy het ’n vrugbare prediker en skrywer van die evangelie geword.
Van Tom McPhetters hoor ons nie weer nie. Hy was net die gehoorsame dissipel van
die Here Jesus Christus om hierdie openhartige gesprek met sy vriend te voer en
‘n buitengewone, bruikbare man in die Here se koninkryk in te lei.
“Here, vandag wil ek oor myself seker maak en ook na iemand toe gestuur word.”
