Lees Lukas 5: 1 – 11
“Meneer,” antwoord Simon, “ons het die hele nag deur geswoeg sonder om iets te vang, maar op u woord sal ek die nette uitgooi.” En toe hulle dit doen, het hulle so ’n groot klomp vis gevang dat hulle nette wou skeur” (5,6)
In Wes-Texas is daar ’n beroemde olieveld, bekend as The Yates Pool. Gedurende die depressiejare was die olieveld ’n ene Yates se skaapplaas. Yates het onder die depressiedruk so swak gevaar met sy boerdery, hy kon nie meer die rente op sy verband betaal nie. Hy sou binne afsienbare tyd sy grond verloor. Op ’n dag daag ’n oliemaatskappy se seismografiese span by sy huis op. Hulle vertel hom, daar is moontlik ’n oliebron op sy grond. Hulle vra toestemming om vir olie te boor. Hy gee sy samewerking. Op 1 115 voet (370 meter) diepte boor hulle ’n oliebron raak, wat 80 000 vate olie per dag lewer. Aangesien die grond nog aan Yates behoort het, behoort die mineraalregte toe ook nog aan hom. Hy leef op ’n staatstoelaag en wis nie hy is ’n multimiljoenêr nie! Die skrywer van die verhaal in “Parables”. stel dit so: “A multimillionaire living in poverty: What was the problem? He did not know the oil was there. He owned it, but he did not possess it. That is like many Christians today who don’t realize how rich they are in Christ.”
Dit is ’n groot ontdekking in jou hart, om tot die insig van jou rykdom in Christus te kom. Selfs na die wonderlike visvangs en baie ander openbaringe van sy krag voor Petrus se oë, bv. die voeding van die skares, genesings, die opwekking van Lasarus, het Petrus in sy hart steeds blind gebly vir sy rykdom in Christus. Eers na Christus se kruisiging – want daardie dag nog het hy Jesus drie keer verloën: “Ek ken die man nie!” – en na die uitstorting van die Heilige Gees, gaan sy oë vir sy groot rykdom in Christus oop. In sy eerste sendbrief skryf hy aan die gelowiges: “Nou het ons ’n lewende hoop op die onverganklike, onbesmette en onverwelklike erfenis wat in die hemel ook vir julle in bewaring gehou word” (1 Pet.1:4). In ons omgang met God deur sy Woord en deur die werking van die Heilige Gees in ons hart, terwyl die Here Jesus in ons oë al groter word, leer ons ons rykdom ken.
“Here, vandag wil ek leer hoe ryk ek in U is.”
