Lees Genesis 22: 1 – 14
“Abraham…sien agter hom ’n skaapram wat aan sy horings in ’n bos vasgevang is. Hy het die ram gaan vat en hom in die plek van sy seun…geoffer. Toe noem hy die plek: ‘Die Here voorsien.’ Daar word nou nog gesê: ‘Op die berg van die Here word voorsien.’” (13,14)
In The Pilgrim van Desember 1976, vertel S. Nathan dat die sendeling, Angus Brower, wat diep in die Kongowoud sendingwerk gedoen het, deur van grammofoonplate, met die evangelie in die inboorlingstam se taal, gebruik gemaak het. Dit was natuurlik in die tyd voor die gerief van kassetbande. Toe raak sy grammofoonnaalde op. Hy het in die destydse Leopoldville en ander bereikbare winkels vergeefs na grammofoonnaalde gesoek. Toe Kerstyd nader kom, het Nathan in Engeland gereël dat ’n algemene winkel vier pakke met droëvrugte na vier adresse in die Kongo (nou Zaïre), moes stuur. Een van die pakke het by ’n sendinghospitaal beland. Mej. Forrel, die sekretaresse van die hospitaal, het dit ontvang en oopgemaak. Net daarna kom Angus Brower daar aan. Sy eerste besoek in sewe jaar aan die hospitaal. Sy nooi die sendeling om vir hom van die droëvrugte uit die pak uit te haal. Net toe hy die pakkie droëvrugte uit die houer uitlig, roep hy in verbasing uit: “Loof God!” Die bodem van die houer lê vol grammofoonnaalde, wat blykbaar in die winkel, sonder dat iemand dit opgemerk het, in die houer uitgeval het. “Ek het so gebid vir grammofoonnaalde,” verduidelik hy aan die verbaasde mej. Forrel.
Soos met Abraham weet God van sy kinders se behoeftes en Hy voorsien op sy eie wonderlike manier vir hulle. Die geheim is egter: dit gebeur met die Christen wat in die wil van God beweeg. Abraham het in gehoorsaamheid aan God sy seun gaan offer, en op daardie plek van gehoorsaamheid, het die Here in sy behoefte voorsien. Weg van God af, op ’n weg van ongehoorsaamheid, sal dit nie gebeur nie, tensy die persoon tot stilstand kom en na God toe omdraai. Elkeen wat weet hy bevind hom op die berg van die Here, die plek van gehoorsaamheid aan God, kan vertrou in God se presiese, tydige voorsiening.
“Here, vandag wil ek in u wil wandel en gerus wees.”
