“Julle sal krag ontvang wanneer die Heilige Gees oor julle kom, en julle sal my getuies wees in Jerusalem…en tot die uithoeke van die wêreld” (8).
Toe adml. Foote in Siam was, vertel Earnest Worker, het hy die koning met sy howelinge en amptenare vir ’n ete na sy skip toe genooi. Na almal plaasgeneem het, het adml. Foote, soos sy gewoonte was, die Here se seën oor die ete gevra. Die Siamese koning het sy verbasing uitgespreek: “Ek het gedink net die sendelinge doen dit!” “Dis waar,” antwoord adml. Foote, “maar elke Christen ís ’n sendeling.”
Ons gaan in ons nuwe jaar in verskillende omgewings en omstandighede beland en met verskillende mense in aanraking kom, maar oral waar ons mag kom, moet ons deur ons gedrag, taal, houding vir die Here getuies wees. ’n Jong meisie het eendag met haar dominee gaan praat. Sy werk in ’n fabriek saam met onverskillige mense, vertel sy hom. Dis vir haar swaar om daar haar Christenskap uit te leef. Dink hy nie sy moet, terwille van haar eie geestelike behoud, liewer ander werk soek nie? Hy vra haar: “Waar het ’n mens lig nodig?” Sy het sy bedoeling verstaan. In die stikdonker is selfs ’n klein liggie baie werd. Sy het teruggegaan, haar getuienis uitgeleef en op ’n dag met ’n paar ander persone, wat ook in die fabriek werk, na die dominee toe teruggekeer. Haar bestendige mooi lewe het op hulle indruk gemaak. Sy het hulle saamgeneem kerk toe en later saam met hulle ’n werksbiduur begin. “Julle is die lig van die wêreld. Laat julle lig so voor die mense skyn, dat hulle julle goeie werke kan sien en julle Vader in die hemel, verheerlik” (Mat.5:14,`6).
Om te kan brand, moet ’n lig aan krag geskakel wees of die lamp moet vol lampolie wees. Ons het die inwoning van die Heilige Gees nodig om vir Christus getuies te kan wees. As ons ontrou is om Christus se getuies te wees of ons misluk in ons pogings en sien nooit vrug op ons taak nie, kan ons met vrymoedigheid met ons behoefte en teleurstelling na die Here toe gaan. ”…’n lamppit wat dof brand, sal Hy nie uitdoof nie” (Jes.42:3). Hy het ons te nodig. Hy wil ons graag bruikbaar vir sy koninkryk maak!
“Here, vandag wil ek met U krag Ugetuie wees.”
