“Toe het Maria ‘n halfliter egte, baie duur nardusolie…op Jesus se voete uitgegiet en sy voete met haar hare afgedroog. Die hele huis is deurtrek met die geur van die reukolie” (3)
Michael LeBoeuf skryf in sy boek, How to Win Customers and Keep Them for Life, van die beroemde New Yorkse diamanthandelaar, Harry Winston, wat gehoor het van ’n ryk Hollandse diamantversamelaar wat na ’n bepaalde diamant soek om by sy versameling te voeg. Winston het die Hollander gebel en vir hom gesê hy dink hy het dié bepaalde diamant. Die versamelaar het New York toe gevlieg en Winston se verkoopsman het vir hom die diamant gewys en breedvoerig al die fyn tegniese eienskappe beskryf. Die versamelaar het belangstellend geluister, maar weggedraai met die woorde: “Dit is ’n pragtige steen, maar nie presies waarna ek soek nie.”
Winston het op ’n afstand na hulle gestaan en luister. Toe die versamelaar wegdraai, keer Winston hom en vra: “Sal jy omgee as ek die diamant net weer vir jou wys?” Die versamelaar was dadelik bereid. Winston het dieselfde diamant weer vir hom gewys, maar in plaas van op die tegniese aspekte te konstreer, het Winston spontaan oor sy eie bewondering vir die diamant en die treffende elemente van die prag van die diamant gepraat. Die versamelaar het dadelik van opinie verander en die diamant gekoop. Terwyl hulle wag dat die diamant verpak word, vra die versamelaar vir Winston: “Hoekom het ek ingewillig om die diamant by jou te koop, terwyl ek na jou verkoopsman se praatjie dit nie wou koop nie?” “My verkoopsman ken diamante beter as ek,” antwoord Winston, “maar ek het diamante lief. Dit is vir my meer as net ’n verkoopsartikel. Dit is ’n wonderbare deel van die skepping.” LeBoeuf sluit af: “People are more persuaded by die depths of your beliefs and emotions than any amount of logic or knowledge you possess.”
Liefde en bewondering vir die Here Jesus, spreek duideliker tot ’n ander se hart, as die kennis wat ons van die Bybel of die geloofsleer het. Maria se daad uit liefde en bewondering vir die Heiland het die huis met ’n soet geur gevul. Leer Hóm ken en laat die Heilige Gees die hart met liefde vir Hóm vul, en ons getuienis sal mense na Hom toe trek.
“Here, vandag bring ek my liefde en bewondering vir U na u voete toe.”
