Lees Matteus 6:9-15
“Ons Vader wat in die hemel is … gee ons vandag …”
’n Sendeling het in die teenwoordigheid van ’n aantal inboorlinge sy telefoon
gebruik. Hulle het verbaas geluister toe hy die werking van die telefoon
verduidelik. Hy kan direk met iemand, wat ver is, praat, asof die persoon naby hom
is. Toe vra een: “Waar is die wonderlike ding gemaak?” Die sendeling antwoord:
“Engeland.” Die swartman skud sy kop. “Dis jammer, want dan kan ons dit nie
gebruik nie. Die ding sal nie ons taal verstaan nie. En ons kan nie Engels praat
nie.” Hierop bel die sendeling ’n vriend van hom, wat die inboorlinge se taal kan
praat. Hy gee die telefoon vir die swartman om self te praat. Verstom luister hy
hoe die ander persoon in sy eie taal met hom praat: “Hy praat ook ons taal! Hy is
naby!” roep hy uit. Hierdie insident het die sendeling geleentheid gegee om vir
hulle te vertel hoe God, as ons bid, ons taal verstaan, en hoe ons ons daaglikse
behoeftes aan God kan vertel.
Die aanvang van die gebed wat Jesus sy dissipels leer bid het, maak dit dadelik
vir ons maklik om te bid. “Ons Vader…” ’n Vader verstaan sy kinders se taal: die
lippetaal en die harttaal. Jesus het ons geleer om vir ’n paar “elke dag”-
behoeftes te bid: vandag se kos; vandag se oortredings; ander se oortredings
vandag aan ons; vandag se versoekings; vandag se aanvalle van die Bose. Ons kan
vrymoedig so bid, omdat die Here Jesus dit vir ons in die mond lê. Hy het vir ons
die weg na God toe oopgemaak. “Dít verseker Ek julle: Wat julle die Vader ook al
in my Naam sal bid, sal Hy vir julle gee…Bid, en julle sal ontvang, sodat julle
blydskap volkome kan wees” (Joh.16:23,24). En die Heilige Gees, wat Jesus belowe
het, leer ons hoe en wat ons moet bid. “…die Gees van die waarheid (sal) …by julle
bly en in julle wees… Hy sal julle alles leer en julle herinner aan alles wat Ek
vir julle gesê het”(Joh.14:17,26). “Die Gees staan ons ook in ons swakheid by: ons
weet nie wat en hoe ons behoort te bid nie, maar die Gees self pleit vir ons met
versugtinge wat nie met woorde gesê word nie. En God wat die harte deurgrond, weet
wat die bedoeling van die Gees is, want Hy pleit, volgens die wil van God vir die
gelowiges” (Rom.8:26,27). Omdat Hy alomteenwoordig is, hoor Hy ons; omdat Hy ons
lief het, luister Hy na ons; omdat Hy almagtig is, kan Hy gee wat ons vra.
“Here, vandag vra ek vrymoedig daaglikse behoeftes van U.”
