Lees 2 Korintiërs 6: 14 – 7: 1
“Laat ons ons dan reinig van alles wat liggaam en gees verontreinig, en ons in gehoorsamheid aan God volkome aan Hom toewy” (7:1)
Sanyo Electric Co. verkoop ‘n dromtipe wasmasjien, die Aqua, om klere mee te was, stuur Neil Verwey, sendeling in Japan, vir ons die berig. Dit was die klere nie met water nie. Dit het ‘n lugwasfunksie wat die krag van oksidasie gebruik om bakterieë dood te maak en reuke te verwyder. Hierdie lugwasfunksie gebruik osoon, ‘n chemiese stof, wat effektief is om die vuilheid te ontbind. Na omtrent 30 minute is al die die klere is skoon..
Min huise is sonder ‘n klerewasmasjien. Twee faktore dra hiertoe by: ons leef in ‘n wêreld waar ‘n mens se klere daagliks vuil en vuiler word, en tweedens, die meeste van ons dra graag skoon klere.
Hierdie twee faktore gaan dieper as ons klere en ons liggaam. Dit is ook geestelik waar. In die wêreld waarin ons leef raak ons siel, ons hart, vuil. Ons sien, hoor, beleef dinge wat ons innerlik vuil laat voel. As God se Heilige Gees deur sy woord ons van God bewus maak, word ons al dieper bewus van vuilheid in ons harte. Dit is ‘n geseënde toestand as ons van sondevuilheid, onreinheid, sondeskuld, bewus raak. Die Heilige Gees wek in ons die behoefte om geestelik skoon te wees. Oorvloedig skyn God se heilige lig uit sy woord op ons lewe: “Was julle, reinig julle…hou op met kwaad doen…,” en dan kom die wonderlike belofte van vergifnis en reiniging: “Al was julle skarlakenrooi van sonde, julle sal wit word soos sneeu..” Ons Here, Jesus Christus, het ‘n hoë en duur prys betaal om vir ons hierdie hartsreiniging en sielsvergifnis te bewerk: “Maar as ons in die lig wandel soos Hy in die lig is, dan het ons gemeenskap met mekaar; en die bloed van Jesus Christus, sy Seun reinig ons van alle sonde” (1 Joh.1:7 Ou Ver.).
“Here, vandag soek ek reiniging van my sondes.”
