Lees Josua 7:16-26
“…ek wou dit baie graag hê en ek het dit gevat. Dit is in die grond in my tent begrawe …” (21).
In 1799 was die Amerikaanse skip, die Nancy, betrokke by smokkelhandel. Kort voordat die skip ‘n hawe moes binnegaan, gooi die kaptein van die skip, alle dokumente waarop hy aangekla kon word, oorboord. Hy was egter onder verdenking en hy moes voor die hof verskyn. Hy handig vervalste dokumente in. Voor die hof hanteer hy sy saak so goed, die staat was op die punt om die aanklag teen hom terug te trek, toe luit. Hutton van die H.M.S. Ferret in die hof verskyn. Sy bemanning het naby Port Royal ‘n haai gevang. In die pens van die haai was ‘n bondel dokumente wat aan ‘n skip behoort het. Dit was die dokumente, wat die kaptein van Nancy, in die see gegooi het en wat hy gedink het vir goed vernietig is. Hierdie verdoemende getuienis het tot die skuldigbevinding van die Nancy se kaptein gelei. Die kop van die haai is vir ‘n tyd lank in Port Royal vertoon en is nou in Londen in die United Service Museum te sien. ‘n Voortdurende waarskuwing: dinge wat mens wegsteek kom weer uit.
“Wie sy sonde wegsteek, moet niks goeds te wagte wees nie; wie sy sonde bely en daarvan afsien, sal genade ontvang” (Sp.28:13). Akan het baie geleentheid gehad om met sy oortreding vorendag te kom (Jos.7). ‘n Lang proses is gevolg om die skuldige aan te wys. Terwyl dit al nader na hom toe kom, moes hy daarmee uitgekom het en dit bely het. Hoe anders sou sy lot dan nie verloop het nie. Hoe sou dit sy vrou en kinders nie beskerm het nie! “Ellende wag vir dié wat dink hulle kan hulle planne diep wegsteek vir die Here, hulle wat besig is om dinge in die donker te doen en dink: wie sien ons? … Tog is die Here gretig om julle genadig te wees en wil Hy Hom oor julle ontferm”. Die volhardende sondaar en kwaaddoener loop met ‘n toekomslose pad. “Die oortreding van die goddelose agterhaal hom, hy draai hom vas in sy sonde” (Spr.5:22).
‘n Mens wat met die Here en met sy medemens wil reg leef, trek nie ‘n sluier oor sy hart nie, maar gooi alles in sy hart en in sy gedagtes voor die Here oop. “Deurgrond my, o God, deurgrond my hart, ondersoek my, sien tog my onrus raak. Kyk of ek nie op die verkeerde pad is nie en lei my op die beproefde pad! (Ps:139:23,24) So ‘n openhartigheid met God en gewilligheid om die lewe voor die Here reg te maak, is ‘n geseënde en heilsame pad. Die pad van die regverdiges is soos helder oggendlig wat groei en sterker word tot dit heeltemal dag is…(Spr.4:18)
“Here, deurgrond vandag my hart.”
