Lees Romeine 3: 27 – 32
“Ons betoog is tog dat ’n mens vrygespreek word omdat hy glo, nie omdat hy die wet onderhou nie” (28).
Na afloop van ’n diens waar dr. D. M. Stearns die prediker was, kom een van die kerk se mense met hom praat. “Ek hou nie van u boodskap nie. U praat te veel oor die kruis. Dit sou beter wees om oor Jesus as Leier en Voorbeeld te praat, as om so gedurig oor Jesus, as die Gekruisigde Christus, te preek.” Dr. Stearns antwoord: “Sal u bereid wees om Hom te volg in alles wat Hy doen as ek Hom as Voorbeeld voorhou. “Gewis, ja,” sê die man met groot erns. “Nou ja, kom ons kyk dan wat die Here se Woord in 1 Petrus 2:21-22 ons leer,” sê dr. Stearns terwyl hy sy Bybel oopmaak en begin lees, “‘Omdat Christus self…so vir julle ’n voorbeeld gestel het, sodat julle in sy voetspore kan volg. Hy het geen sonde gedoen nie…’ Kan u Hom hierin volg deur nooit sonde te doen nie?” Die man lyk verleë. “Nee,” erken hy, “ek sal dit nie sê nie, want ek is tog ook maar ’n sondaar.” Dr. Stearns glimlag. “My vriend, dan is u eerste behoefte, ’n Verlosser, nie ’n Voorbeeld nie.”
Gelukkig berus ons saligheid nie op ons eie krag en goeddoen nie. “Dit skrywe ek aan julle…dat julle nie moet sondig nie. En as een van ons sondig – ons het Jesus Christus, die regverdige, as ons voorspraak by die Vader. Hy is die versoening vir ons sondes…”(1 Joh.2:1,2). Watter hoop is daar dan vir ons as Christene, as ons in Christus as ons Verlosser vertrou, maar in ons gedrag nog so baie kortkom? Ons vertrou in sy vergifnis as ons met nederige berou ons oortredinge en tekortkominge bely. Dan het ons die bemoediging van die krag van die Heilige Gees wat ons in ons geestelike lewe laat groei en oorwinnend maak. “Laat julle lewe steeds deur die Gees van God beheers word, dan sal julle nooit swig voor die begeertes van julle sondige natuur nie” (Gal.5:16).
“Here, vandag vertrou ek in U om my te red.”
