Lees Markus 4: 26 – 29
“Iemand saai die saad op die land en gaan slaap en staan op, dag na dag, en die saad ontkiem en groei.. “ (26,27).
Die beroemde prediker, eerw. John Flavel, preek een oggend oor die teks: “As iemand die Here nie liefhet nie – vervloek is hy! Kom, Here! Die genade van die Here Jesus sal by julle wees!. My liefde is by julle almal in Christus Jesus” (1Kor.16:22-24). Buitengewone erns heers in die diens. Aan die einde lig eerw. Flavel sy hande op om die seën uit te spreek. Hy weifel. Laat sy hande weer sak en kyk oor die gemeente. Sy volgende woorde word deur `n diepgeraakte gemeente aangehoor: “Hoe kan ek die seën uitspreek, oor ’n gehoor van wie sommige, Jesus Christus nie liefhet nie, en dus, volgens vanoggend se tekswoorde, `n vervloeking is?” ’n Seun van 15 jaar, Luke Short, het tussen die mense gesit. Ook hy beleef die stilte en gewydheid na eerw. Flavel se ernstige woorde. Kort na hierdie gebeure sluit Luke Short by die vloot aan. Dit voer hom weg van sy geboortedorp af en vir die res van sy lewe woon hy in Amerika.
Luke Short het besonder oud geword. Toe hy byna 100 was, was hy nog so sterk, hy kon self op sy plasie werk. Sy gesondheid was goed en sy verstandsvermoë helder. Uit sy vlootervarings en latere jongmanslewe, het hy in `n sondige man ontaard. Hy het onverskillig en sondig gelewe. Hy het ’n honderjarige sondaar geword. Hy was vir baie, baie jare nooit in `n kerk nie.
Een middag sit hy langs een van sy pragtige landerye om te rus. Sy gedagtes draal en vat koers, oor die baie jare heen, terug die verlede in. Daardie kerkdiens kom helder in sy herinneringe terug. Hy onthou die preek, sien in sy gees hoe eerw. Flavel sy hande optel om hulle te seën en sy hande weer laat sak. Die Heilige Gees bring ernstige vertedering in sy hart. Die saad van baie jare gelede ontkiem. Hy hoor weer duidelik in sy gedagte die godsman se woorde: “Hoe kan ek die seën uitspreek oor ’n gehoor van wie sommige Jesus Christus nie liefhet nie, en dus, volgens vanoggend se tekswoorde, `n vervloeking is?” Hy was een van dáárdie mense. Sy sondige jare, wat nou agter die rug lê, druk swaar op sy gemoed. Diep sondeoortuiging vat pos in sy hart. Daar langs sy land kniel John Short neer, bely sy sondige lewe aan God en neem Jesus Christus as sy Saligmaker aan. Na byna 85 jaar het die saadjie, wat John Flavel dié Sondagoggend gesaai het, ontkiem en vrug gedra.
Twee bemoediginge van God se genade spruit uit hierdie gebeurtenis. Die een is vir mense, wat op elke moontlike manier, die evangeliesaad saai en selde vrug sien. Geestelike saad se ontkieming en groei en vrug kan ’n tydsame proses wees. Hou moed en saai! Die ander bemoediging is, dat God sy liefde en genade nie sommer na die eerste weiering van die skuldige sondaar, terug trek nie. Lankmoedig bly die Here in ons hart werk, omdat hy ons liefhet. Moet net nie aanhou weier totdat dit te laat is nie! As u hart nou gereageer het, en u voel om nou na God se genadetroon toe te gaan, doen dit. Ons Voorspraak en Heiland, Jesus Christus, wag reeds daar.
“Here, vandag hoor ek, en voel ek, en kom ek. Ek bid red my.”
