SKRIFGEDEELTE: 1 Timoteus 4:7
"Oefen jou liewer om in toewyding aan God te lewe"
Toe die Dallas Cowboys se afrigter, Tom Landry, gevra was hoe bou 'n mens 'n wenspan het hy geantwoord: "My werk is om mense te kry om te doen wat hulle nie wil nie, sodat hulle kan bereik wat hulle nog altyd wou." Wat wou hierdie voetbalspelers bereik? Oorwinning in die Super Bowl. Wat wou hulle nie doen nie? Die harde werk wat dit sou verg om daar te kom! Om bo uit te kom verg dissipline - vasbeslote, doelbewuste, daaglikse definieerbare aksies met 'n duidelike doel voor oë. Paulus het vir Timoteus afgerig en vir hom gesê: "Oefen jou liewer om in toewyding aan God te lewe." Timoteus was die leraar van die Kerk in Efese, 'n stad soortgelyk aan een van ons groot stede soos Johannesburg, New York of Las Vegas. Dit was 'n besige, ryk en wellustige stad. Paulus het geweet dat dit nie maklik sou wees om daar sukses te behaal nie en maak dus gebruik van die Griekse term waarvan ons die woord gymnasium kry. Dit is hoekom Paulus skryf: "Oefen jou liewer om in toewyding aan God te lewe." Let op twee woorde: (1) Oefen - dit verg herhaalde oefening vir jou verstand en verskillende spiergroepe om in refleks en automaties saam te werk. Dit verenig uithouvermoë en vaardigheid. Oefening is wat die vermoë om te wen, omskep in 'n gewoonte. (2) Jy self - Niemand anders kan dit namens jou doen nie. Kyk in die telefoonboek, daar is nie "Huur 'n Hardloper" of "Leen 'n Tennisspeler" nie. Nee dit hang alles van jouself af. Hoekom oefen? Om soos Christus te word! Deur die lewe te leef soos wat Hy het en deur die Heilige Gees toe te laat om jou deur Sy dissipline van binne af te vorm. So sal jy hierdie doel bereik. Met ander woorde, spandeer meer tyd in die gymnasium van die siel.
