Lees: 2 Petrus 1: 1 – 10
“Omdat julle glo word julle deur die krag van God veilig bewaar… al is dit nodig dat julle vir ’n kort tydjie bedroef gemaak word deur allerhande beproewings, sodat die egtheid van julle geloof getoets kan word” (5,6,7).
Op 1 Junie 1965 vaar Robert Manry met ’n viermeter lange boot, Tinkerbelle, stilweg uit die hawe van Falmouth, Massachusetts. Die bestemming was Falmouth, Engeland. Die boot was die kleinste vaartuig ooit, om hierdie reis te onderneem. Robert Manry was ’n kopieskrywer van die koerant, Cleveland Plain Dealer. Tien jaar agter ’n lessenaar, was vir hom net genoeg verveling vir ’n leeftyd. Manry het net vir sy vrou en ’n paar naby vriende daarvan vertel.
Met sy vaart, moes hy folterende, slapelose nagte verduur, soos hy probeer het om uit die pad van groot skepe te bly. Sy kos het smaakloos geword. Eensaamheid het hallusinasies veroorsaak. Die boot se roer het drie keer gebreek. ‘n Storm het hom oorboord gegooi – as hy nie ‘n tou om sy lyf vasgebind het nie, sou hy homself nooit terug op die boot kon trek nie. Uiteindelik, na 78 dae alleen op die see, vaar hy die hawe van Falmouth, Engeland, binne. Tydens die nagte agter die boot se stuur, het hy hom ingedink hoe hy stil-stil die hawe gaan invaar, in ’n hotel tuisgaan, alleen aandete geniet en die volgende oggend by een van die plaaslike koerante gaan hoor, of hulle dalk belangstel in sy storie. ‘n Groot verrassing het op hom gewag! Nuus oor hom is wyd en syd versprei. Tot sy verbasing ontmoet en begelei 300 vaartuie, met blasende toeters, Tinkerbelle tot in die hawe. Aan wal verwelkom 47 000 mense hom skreeuend en juigend.
Een van die grootste temas in die Skrif is volharding, skryf Radiokansel, wat hierdie verhaal vertel. Dit maak nie saak hoe groot ’n mens se roeping, talent, saak of doelwit is nie, sonder volharding kan mens dit nie maak nie.
Volhard beteken om aan te hou om op ’n doelwit af te stuur, al is die teëkanting ook hoe groot. Paulus se beeld, van hierdie volharding in die geestelike lewe, is ‘n atleet se inspanning om ‘n prys te wen. “En elkeen wat aan ’n wedstryd deelneem, onthou hom in alles—húlle nogal om ‘n verwelklike krans te ontvang, maar ons ’n onverwelklike (1Kor.9:25). Om te volhard in ons geestelike lewe, vereis om die hart geheel aan die Here oor te gee, in Hom te vertrou en die hemel die doelwit te maak. Baie elemente druis in teen hierdie lewenskoers. Die Heilige Gees werk hierdie krag en begeerte, om te volhard, in ons harte. Oorvloedig getuig die skrif van die belangrikheid van volharding. “Maar wie volhard tot die einde toe, sal gered word (Mat.24:13, Mar.13:13)…. verbly julle in die hoop…volhard in die gebed (Rom.12:12). Let op jouself en op die leer; volhard daarin (1Ti.4:16). Elkeen wat volhard om ’n dissipel van die Here Jesus te wees, kan uitsien na ’n feestelike verwelkoming in die hemel! Ons groot praktiese hulp: gereelde Skriflesing, gereelde gebed.
“Here, vandag vestig ek my oë op my wins in die hemel.”
