Lees Johannes 8: 12 – 20
“Ek is die lig van die wêreld. Wie My volg, sal nooit in die duisternis lewe nie, maar sal die lig hê wat lewe gee” (12)
Bob Woods vertel in Pulpit Digest die storie van die ouerpaar en hulle twee kinders, ‘n dogter van 7 en ’n seun van 11 jaar, wat die Carlsbad Caverns besoek het, skryf Neil Verwey…wat reeds 50 jaar lank sendeling in Japan is, vir my. Soos die gidse dit gewoonlik doen, skakel ook hulle gids die ligte af, toe hulle die verste punt in die grot bereik. Hy wil hê die besoekers moet ervaar hoe verskriklik donker dit in die grot is. Die dogtertjie, onverwags en skielik omring met die swart donkerte, gaan aan die huil. Dadelik klink die boetie se stem uit die donkerte op: “Moenie huil nie Sussie. Iemand hier weet hoe om die ligte weer aan te sit.”
Donkerte is ’n vreeswekkende en bekende ervaring. Reeds die tweede vers in Genesis skryf van die donker: “…dit was donker…” So begin die bybel. En die vogende vers skryf dadelik van lig: “Toe het God gesê: ‘Laat daar lig wees!’ En daar was lig.” God bring lig. “God is lig, en daar is geen duisternis in Hom nie” (1 Joh.1:5). Die evangelie se bevrydende boodskap is lig. Ons ken die omgewing se natuurlike donkerte. Ons ken ook mense, of selfs volke, se donker denke – onkunde. Dan is daar geestelike, of geloofs-duisternis. In ’n mens se gemoed en hart kan dit donker wees. Die ervaring van duisternis in die hart maak ’n mens diep ongelukkig.
Die koms van die Here Jesus aarde toe, word deur die profeet, Jesaja, met die aansteek van lig beskryf: “Jy, gebied Sebulon … Galilea waar die heidene woon … het ’n groot lig gesien; hulle wat in die skemerland van die dood lewe, vir hulle het die lig opgegaan” (Mat.4:15,16). Iemand wat die redding van die Here Jesus, sy dood aan die kruis vir ons sondeskuld en sy opstanding uit die dood, om vir ons geestelike lewe te bewerk, verstaan en glo en toe-ëien, gaan uit ’n donker gemoedsbelewing oor na ’n gemoedsbelewing in die lig. “Vroeër was julle die ene duisternis, maar nou in die Here is julle lig” (Ef.5:8). Die Heilige Gees wek geloof in die hart op en ons glo God het ons ons sondeskuld vergewe, ons glo God beheer ons lewe en ons glo ons gaan hemel toe as ons die dag sterf. Die Persoon van die Here Jesus word vir ons werklikheid en ons begin ’n lewe van vriendskap en omgang met Hom. Hy en sy liefde is die lig wat die donker uit ons harte verdryf. Die Bybel word vir ons die aardse lamp wat ons in die Here se lig laat lewe.
“Here, vandag kom ek in U lig in.”
