Lees Kolossense 3: 5 – 17
“Wees geduldig met mekaar en vergewe mekaar as die een iets teen die ander het” (13).
Neil Verwey, sendeling in Japan, vertel van die kort gehumeurde seuntjie wat vir almal ’n pyn was. Ten einde raad met die mannetjie, gee sy pa vir hom ’n sakkie spykers en ’n nuwe hamer. Hy sê vir hom: “Elke keer as jy kwaad word, slaan jy ’n spyker in daardie paal in.” Die eerste dag het die oudjie 37 spykers gaan inslaan. Die volgende weke het hy geleer om sy humeur te beteuel en die spykers wat hy moes inslaan het al minder geword. En toe op ’n dag was dit nie vir hom nodig om een spyker te gaan inslaan nie. Hy het geleer om sy humeur te beteuel en dit het sy algemene omgang met almal om hom ook beter gemaak. Hy gaan sê dit vir sy pa. Sy pa gee vir hom ’n nuwe tang en sê vir hom, hy kan nou die spykers gaan uittrek. Dae het omgegaan, maar op ’n dag gaan wys hy die laaste spyker vir sy pa. Hy het almal uitgetrek. Sy pa vat sy hand en saam gaan kyk hulle na die paal. Sy pa sê vir hom: “My seun, ek is saam met jou bly, maar ek wil jou graag ’n groot les vir die lewe leer. Kyk na al die gaatjies in die paal. Elke spyker het sy gaatjie agtergelaat. As ’n mens iets leliks doen of sê as jy kwaad is, maak jy ’n merk en niks kan dit weer regmaak nie, al sê jy hoeveel keer jy is jammer. Die merk bly in iemand anders se hart.” Salomo het die skade wat seermaakwoorde doen baie erg beskryf: “Praat sonder om te dink kan soos dolksteke wees…” (Sp.12:18).
“Here, vandag wil ek versigtig wees met my humeur en met my woorde. Help U my, asseblief.”
