Lees Prediker 11: 1 – 6
“Werp jou brood op die water, eendag kry jy dit terug” (1).
Eendag sien die arm seun, wat van deur tot deur goedjies verkoop om skoolgeld bymekaar te maak, hy het net ‘n enkele, klein muntstukkie in sy sak. Geen geld nie en hy is honger, vertel Neil Verwey, sendeling in Japan, vir ons die storie. Hy besluit hy gaan by die volgende deur kos vra. ‘n Pragtige, jong vrou maak die deur oop en die seun se moed begewe hom. Hy vra net ‘n bietjie water om te drink. Die vrou dink, die seun lyk vir haar honger. Sy bring vir hom ‘n groot glas melk. Stadig, lekker drink hy die glas leeg. “Wat kos dit?” vra hy. Sy antwoord: “Dit kos niks. Dit het vir my gelyk jy het meer nodig as net ‘n glas water.” “Dan sê ek uit die diepte van my hart, dankie,” sê die seun. Toe Robert Kelly daardie huis verlaat voel hy nie net fisies verkwik nie, maar sy geloof in die Here en in sy medemens is sterker. Hy was op die punt om sy moeilike lewenstryd prys te gee.
Baie jare later word daardie selfde jong vrou ernstig siek. Die plaaslike dokters is raadop. Hulle stuur haar na ‘n groot stadshospitaal toe. Spesialiteite word ingeroep om haar seldsame kwaal te diagnoseer. Dr. Robert Kelly word ook ingeroep. Toe hy die naam van die dorp, waarvandaan die plattelandse pasiënt kom, hoor, kom daar ‘n vreemde lig in sy oë. Hy staan dadelik op en gaan na haar kamer toe. Hy herken haar dadelik. Hy neem hom voor om vir haar sy bes te doen en geen koste te ontsien nie. Na ‘n lang stryd, word sy beter en herstel vinnig. Dr. Kelly gee opdrag, die rekening moet na hom vewys word, voor dit aan haar besorg word.
Na ontvangs van die rekening is die vrou bang om dit oop te maak. Sy vrees, dit gaan ‘n groot deel van haar reeds skrale lewensinkomste opeis. Eindelik maak sy dit oop en kyk verslae na die groot bedrag onder aan die staat. Dan lees sy woorde wat dr. Kelly ingeskryf en onderteken het. “Ten volle betaal met ‘n glas melk,” gevolg sy handtekening: “Dr. Robert Kelly.” Met betraande oë buig sy dankbaar haar kop: “Dankie, Here, dat u liefde en goedheid steeds deur menseharte en mensehande vloei.”
“Here, vandag belê ek goeddoen in ’n ander se lewe.”
